U zgjua Vera

Kalosh Çeliku

Lulet flenë kokë më kokë. Bari                     
Shelgu e përkund një zog në degë.                   
Lejleku, ama ia ka thënë mbi çati                     
Dhe, ma kujtoi tim Atë me kosë në Livadh.

Vapë. Edhe gjinkalla këndon këngë.             
Flutura ime me pika mbi një lule                 
Krushqit vijnë pa nuse. U zgjua Vera…

Gratë e mia vyshken në heshtje

Vjeshtë. Bryma ka rënë në Kopsht               
Gjethet i ka djegur. Lulet.                                   
Ftoit ia ka shkundur degët                         
Kumbullës. Edhe mollën verore.                    
Verdhë. Verdhë. Dhe, verdhë.

Këmbëkryq jam ulur në Kopsht                         
Dhe, u lutem si Zotit grave të mia!                        
Që, vyshken në heshtje. Shtrat                             
E mi bëjnë poezitë të çelin në Vjeshtë…

Zonja Vdekje do të më ringjallë

Unë shkoj matanë kur të dua vetë                 
Vdes. Dhe, ringjallem si Feniksi.                            
O burra, vij nga mesi i të vdekurve                         
E pash Zonjën Vdekje. E bukur Nuse.                
Edhe njëherë më ringjalli në Qafë Thanë.
 
Unë shkoj matanë kur të dua vetë                  
Vdes. Dhe, ringjallem si Feniksi.                    
Zonjën Vdekje e kam Nuse pa kurorë…