Parku Arenele romane

Arjan Th. Kallço

Edhe pse vjeshta ende nuk e ka
Vulosur rikthimin e saj
Mbi token tonë,
Në park ndihet si në shtëpinë
E saj, e pashqetësuar nga
Arratisja e furishme e verës
E ndjekur këmba-këmbës
Prej pararojës vjeshtake.

Gjethet tashmë e kanë humbur
Vitalitetin gjelbërak dhe të dremitura
Bien njëra pas tjetrës në lëndinat që
Si për çudi e ruajnë ende fillin e jetës.
Mbi një përzjerrje ngjyrash apo
Jetë pajetë
Njerëzit ecin nëpër to, se mendimet
Ikin gjetiu, turren pas të tjera vorbullash
Në kacafytjet e përditshme
Të kohës që nuk i pret dot.

Bukuresht, Shtator 2012