* * *

Nga Vladimir Marku

Drilon 2003

Natyra duhet të ketë qënë e dashuruar

Kur stisi këtë mrekulli

Të quajtur, Drilon

Mani i egër përkulur mbi mua

Krah hapur me mirësinë jeshile të tij

Nga vjen një aromë virgjërie

Ndonëse e moçme, se sa nuk e di

Pëllëmbët e gjetheve ka futur në ujë

Që mua të më bëjë freski

Imazhi në ujë

Sytë m’i lbyr

Dhe ndihem pa peshë në nivelin e ndërmjetëm

Parajsa jeshile e manit të egër mbi mua

Ëndrra e imazhit të saj poshtë nën ujë

I bie të jem perla në guackë

Ironia më shpëton me zë

Ju rosa ç’keni që më shikoni?

Jam unë i vetmi

I vetmuari Çehovian i dashuruar

Mend shumë mos më shisni

Se rosak dikur kam qenë dhe unë

Dhe kujdes nga varkëtari

Që rremave u jep

Valëza duke shkaktuar

Që të ndrojtura largohen si mrekulli

Çfarë rrëmon atje në fund

Fatin tënd në formën e një krimbi?

Më bën të mendoj se fati i mirë

Fati i keq i dikujt tjetër është

Po mbetem supengritur para fatit tim

Nga një anë Sfakenaqis

Trebicka nga ana tjetër

Një urë druri në mes

Nga njerëzit e lumtur hidhen

Andej e këndej

Një patë vjen e përshëndetet me rosat

Duke i përzënë pa ceremoni

Nga territori tashmë i vet

Parajsa paska hierarki

Një rosë e bardhë më afrohet

Më kundron kureshtare me syrin e kuq

Ndërsa unë pi mendueshëm Red Bull

Oh, Zot, pranë të shoh ty!

Je ti? Fërkoj sytë

Je ti që më shikon dhimbshëm

Me një hije lumturie poshtë syve

Nuk flet, nuk të lenë të flasësh

S’ka gjë, mos fol, rri aty

Shiko si pi Red Bull

Me këpurdha e fileto viçi

Me fantazma e imazhe

Ashtu si ti që më tretesh në efir

Dhe nuk arrij të jem i lumtur

Atëhere rosave u hedh bukë

Që për qënie të tjera jeta t’ia vlejë

“Shkrimtar je?” më pyet kamarieri

I ndrojtur me mirësjellje

“Njëfarësoj” i them unë me buzëqeshje

Gjirise, gjirise – kthehu, kthehu

Thotë kënga

Mani i egër pi ujin e ftohtë të Prespës

Pata me sqep në pupla po e tremb

Varkat e zbrazura dremisin në breg

Njerëz vijnë e ikin duke eksploruar brigjet

Ndoshta, mendojnë se jam i çmendur

Dua të interpretoj numrin e dhomës

101

Si “JO” me pikëçuditëse

Enigma e parajsës

Zëra fëmijësh

Muzikë në të dy anët e brigjeve.