Po vdes në dhe të huaj

Nga Dhimitër Pasko

Po të vdes në dhe të huaj

-Shortë mërgimtari –

Të ma bëni varrin tim

Ku do bje së pari.

Pa një grusht nga toka jonë,

-Balt’ nga balt’ e vetë –

Të ma sillni e ta vini

Drejt në zemr’ e shkretë.

Se kjo balt’ e Vendit tonë

Mallet do m’i shuaj,

S’do më duket fort i rëndë

Moj, ky dheu i huaj.

E të vini të m’i thoni

Asaj Nënës sime:

Zi mos qajë, zi mos mbajë

Po asnjë thërrime.

Se m’ i lumtur jam i fjetur

Se sa i mërguar

Mot pas moti arratije, -

Zemër copëtuar…

Pa fytyr’ e saj tretur

-Që e kam ikone, -

Lart mbi varr do më qëndrojë

Sot e gjithëmonë…

Vjeshtë, 1941