Krishtlindje!

Milianov Kallupi *

Tingull mbi dushkajë, mbi mareshtë,

tingull mbi lofatë, mbi lulevile.

Muzikë shiu.

* * *

Pika shiu 

Mbi gjineshtrat tufalake. 

Mendime të freskëta.

* * *

Qajnë shkëmbinjtë, qajnë!

I vetmi ngushëllimtar-

Dielli.

* * *

Grushtëza e folezës

vuan heshtjen e shtegëtimit.

Një flutur erdhi e aty u preh.

* * *

Erë s'ka gjëkundi.

Prapë gjethet lëkunden

si në valset e Shtrausit.

* * *

Gjethe panje.

Sy të mëdhenj,

që lexojnë dritën.

* * *

Epitaf i harruar,

i harruar dhe varri,

përmbytyr nga barëra të egra.

 * * *

Krishtlindje!

Oh, si bien kambanat!

Për kumt e për zgjim.

U drodh cipa e qiellit.

Ai,

binjaku i diellit,

u lind.