Fluturim për në Dardani

Nga Remzi Limani

NJË ZË NGUSHËLLIMI

Në rregull! -

vetëm sa desha

të të ngushëlloj zëshëm

sepse

edhe unë

e ndjej thellë mërzinë tënde

ndaj

edhe unë ndjej nevojë

të ngushëllohem me zërin tënd...

përmbahu dhe bëhu e fortë!

FLUTURIM PËR NË DARDANI

Natën e kaluar

nata kishte ngrënë dhëmbët e saj 

përtej oqeanit udhëve të lagura

ajo ndjeu sëmbimet e një shpirti

ca therma mbi gjoksin e babait të saj

grahmat e fundit morën krahët

një zogth shpirti ngjiti qiellin

mori fluturimin për në Dardani.

YLLESHA

Një frut qielli ylleshë syqeshur

heshtas shkriu buzëve tua

nuk ka vend tjetër mbi këtë tokë

faqeve tua shuplaka mali

ku vdesin yjet prej qejfi

ndaj, je e ëmbël sa s'bën më

pra, them me kompetencë

nuk ka trup tjetër më të shenjtë

se trupi yt plot pashi të lakmuara

një trup ku bien shkëlqimet e yjeve

dhe, kjo është arsyeja ëmbëlake

e një vendi trup i shenjtë

ku burrat i praktikojnë lutjet 

duke u përtokur mrekullive tua

sepse, ti je ylleshë qielli

në ty fshehet një vend i shenjtë...

KANAVACË BOSHE

I tërë qyteti i lindjes

më duket një kanavacë boshe

askund asnjë konturë 

udhët e krehura 

nuk më bien në sy

asnjë vijë 

e tërhequr shuplakave të dorës 

për ta kuptuar fallxhoret 

fatin e udhëve

syri njeriut nuk e di

cilën udhë ta merr ngrykas 

dhe të hiqet terrinës

kah të bartet ngarkuar 

me hejbe kuajsh

ditët bëhen kurva 

të shtrira trotuareve

netët rrudhen 

në një pikë të vetme kërthize

kah të bartem 

ngarkuar me lehjet e natës?