Babëzi Aristokratike

Nga Eduart Sulollari 

Babëzi Aristokratike

(për mbjelljen e pemëve frutorë në varreza )

Përpëlitet e gjelbër ngjyrë...

Ylber i hutuar

rend të fshihet mbas kindash

të një reje vejushë .

Thikë e hijes së plisit 

i preu krahun barit njomëzak.

Rrënjët, 

gërryejnë dherat e fjetur.

Toka, 

gjithnjë dhè më e vetmuar

kryqëzon vështrimin

me murin e rrënuar rrethues.

Afrohet vera.

Heshtur mban shportat në duar,

kujtim i mbjelldhjes

qetësinë e gëzimit pikëllon.

Edhe njëhere të vdekurit

sytë hapën, 

mbas kaq e kaq motesh,

dhe panë

se si në kohën e pjekjes

kockat ua vilnin...

31- MAJ- 2018

E Enjte

Lin - Pogradec

Refleksione Trishtimi

Syth i ri, 

njomur doçkat

lotit të vesës.

Era, 

gërvishti gjunjët

arës pluguar

nga drita.

Klithmë e pulëbardhës

velë - që sundon horizontin.

Degë të vogla pemësh, 

gishtat shpojnë

tek gardhi i rrëzuar i ditës.

Orët ecin, 

akrepi i kuq i sekondave 

muzgun ndez.

Perëndimi, 

u var në krrabën e çobanit

si një mjekër e parruar

gjoksit te lodhur.

Braktisur prej ardhjes tënde, 

trishtimi më rrethon si një fashë

bërrylin e thyer të statujës.

26 Prill 2018

E enjte 

Lin-Pogradec