Politika shqiptare, në krizë të thellë

Sigurisht, politika destruktive nuk i shërben në asnjë këndvështrim shqiptarëve dhe Shqipërisë. Kjo për vetë arsyen sepse shtresat e gjera të shqiptarëve, që shpresojnë dhe aspirojnë për t’u ofruar në BE, e shikojnë veten në abstenim të pashmangshëm  nga Europa nëse kjo situatë do të vazhdojë kështu. Shqiptarët e shikojnë imazhin e Shqipërisë si një gjenerator problematik në Rajon, e shikojnë veten si të vetëpërjashtuar si rezultat i politikës radikale të të dyja partive respektive-PD dhe PS dhe thjeshtë e thjeshtë, për interesa grupesh të politikave që shikojnë interesat e ngushta partiake.
Radikalizmi politik i të dyja partive, PD dhe PS, sigurisht që është në dëm të popullit dhe në dëm të imazhit të Shqipërisë para faktorit ndërkombëtar. Shqipëria në NATO si pjesë në mes familjes së madhe e shumë prestigjioze siç është NATO, është një shans i madh, për Shqipërinë që duhet të bëjë hapa përpara për në BE, pasi drita jeshile për në Europën e Bashkuar është e hapur dhe optimiste. Para këtij fakti që BE-ja kërkon, debati politik konstruktiv nga të dyja palët, brenda kontureve të Parlamentit, kërkon reforma efikase në disa drejtime, pikërisht në këto momente, si me bilbil politika shqiptare gjeneron konflikte të thella, radikale dhe shumë serioze për fatet e vendit.

Natyrshëm shqiptarët pyesin, kërkojnë dhe vështrojnë me shqetësim nga politika shqiptare, se cila palë do të tolerojë për zgjidhjen e kësaj krize e cila mundet të pjellë situata destruktive? Në këndvështrimin tim, momentalisht ka shumë pak shenja të tolerancës nga mazhoranca, ndërkohë që opozita paraqitet e prerë, ose të hapen kutitë, ose Berisha të largohet nga Kryeministër. Në këto momente jemi para dy qëndrimeve, nga njëra ana opozita me të drejtë, sipas Kodit Zgjedhor kërkon të hapen kutitë e të investigojë disa zona zgjedhore tek të cilat PS dyshon se ka abuzime të madha. Nga ana tjetër, PD-ja me të drejtë i referohet Vendimit të Gjykatës lidhur me kërkesën e PS. Pra jemi para një situate politike realisht të turbullt, shumë të çorientuar, të shthurur  me plot akuza dhe ofendime të ndërsjellta, pse jo dhe abuzive. Shumëkush shikon me pesimizëm mundësitë për tolerancë. Pra, është dhe mbetet enigmë se, cila palë do të tolerojë, por mendoj se mazhoraca mundet të tolerojë për të shmangur një krizë të thellë politike, e cila do të ishte në interesin e saj, sepse ndryshe, kjo krizë politike ka vetëm një rrugë zgjidhje të parakohshme.

Kur pyesim dhe shpresojmë për reflektim nga të dyja partitë që e kanë shkaktuar këtë situatë krize të thellë politike, pse jo edhe shpërthyese, me syrin e njeriut që është shumë pranë zhvillimeve politike, mendoj se reflektimi fillimisht do të vijë nga mazhoranca, e cila është në qeverisje, mbasi një situatë destruktive, nuk do të ishte në interesin e mazhorancës. Po të vëzhgojmë nga afër e me kujdes prononcimet e liderit të mazhorancës- Kryeministrit Berisha, vërejme se ai ka dhënë shenja se mundet të tolerojë pak nga pak, lëshime milimetrike, që kjo krizë të kalohet për momentin. Në gjykimin tim, do të jetë personalisht Berisha që do të tregojë se ai është për tolerancë dhe vazhdimësi. Këtë refleksion nuk dihet si do ta presë lideri socialit, Edi Rama. Për të dalë me konkluzionin përfundimtar për të ardhmen dhe zhvillimet e mëtejshme të politikës shqiptare, mbetem shumë i lëkundur në gjykimin tim, se si do të precipitojë situata politike. Një gjë shikohet dhe lexohet qartë, nëse situata politike nuk do të gjejë zgjidhje të shpejtë, nëse nuk do të tolerojë asnjëra palë, kjo politikë radikale dhe agresive e ndërsjelltë, ka vetëm një drejtim, krizë të thellë politike, te pakapërcyeshme, e cila do ta çojë Shqipërinë në zgjedhje të parakohshme, të cilat mund të bëhen njëherazi me zgjedhjet lokale.