Muri i Vajtimit! ( Zgjedhjet Lokale në Maqedoni, 2017)

Nga Abdulla Mehmeti

Partitë politike të shqiptarëve në Maqedoni dhe jo vetëm ato, me fajin edhe të qytetarëve që i kanë votuar deri më sot, sidomos të intelektualëve të papërgjegjshëm, që kanë heshtur para çdo fatkeqësia që e goditi popullin tonë dhe të gjithë qytetarët e këtij shteti, pa dallim të përkatësisë etnike e fetare, në vend të shpenzimeve të panevojshme për fushata parazgjedhore, do të duhej që të ndërtojnë nga një MUR VAJTIMI, tejpërtej shtetit, sidomos në qytetet dhe vendbanimet shqiptare, ku varret e të parëve po shkatërrohen, jeta shuhet dalëngadalë dhe djepat mbeten thatë; aty ku njëqind vjet ka vepruar dora e zezë e shpërnguljes dhe shfarrosjes së popullatës vendëse, sidomos të racës autoktone shqiptare, fatkeqësisht, ku edhe sot kjo politikë shoveniste vazhdon të mbjell varfëri, frikë e tmerr mbi qytetarët shqiptarë dhe mbi banorët me përkatësi tjetër etnike e fetare, që tradicionalisht kanë kultivuar fqinjësi të mirë me shqiptarët; për vitet e humbura të tranzicionit, shtetin ligjor dhe demokracinë e munguar, lirinë dhe barazinë e nëpërkëmbur nga nëntoka kriminale, e cila ka jetuar me haraç dhe krime, ndërsa qytetarët përditë e më tepër janë varfëruar, me të ardhme të pasigurt, ndërsa çereku i banorëve janë larguar nga vendi për mungesë perspektive, pasiguri dhe terror institucional e politik mbi ta (sipas Bankës Botërore, mbi 520 mijë qytetarë janë larguar deri më sot nga Maqedonia në botën e jashtme, gjysma e tyre llogaritet se janë shqiptarë).

Çdo qytetar i këtij vendi, sidomos shqiptarët, kanë nevojë më shumë se kurrë, për mirëqenie, progres ekonomik, liri dhe të drejta qytetare e kombëtare, për sigurimin e ekzistencës dhe mirëqenies në vendlindjen e tyre, jo në botën e jashtme, pa imponime nga jashtë, sidomos nga hegjemonizmi i fshehtë serb në Maqedoni, të cilin e kanë përkrahur deri më sot edhe partitë politike të shqiptarëve (ky konstatim del, duke marrë parasysh se gati çdo vit është organizuar nga një ekspeditë ushtarake-policore në vendbanimet shqiptare, përmes proceseve të montuara politike, nga viti 1992 e deri më 27 prill 2017).

Ky shtet u takon qytetarëve të barabartë, shqiptarë dhe të tjerë, jo klaneve politike, grupeve kriminale që mbijetojnë duke mbjellur urrejtje ndërnacionale e ndërfetare, me krime e gjak, dhunë e mashtrime, me haraç mbi qytetarët e lodhur nga propaganda dhe skamja (institucionet ndërkombëtare kanë konstatuar se qeveritë e derisotme në Maqedoni i kanë plaçkitur qytetarët dhe shtetin përmbi 12 miliardë euro)!