Urime Kosovës

Lartmadhëria e Saj, Mbretëresha Elizabeta II, dhe Sekretari Britanik i Punëve të Jashtme, David Miliband, kanë përgëzuar popullin e Kosovës në njëvjetorin e Pavarësisë. “Sot një vit më parë, një kapitull i ri i historisë u hap me shpalljen e pavarësisë së Kosovës. Që atëherë liderët kosovarë vendosën institucionet demokratike, miratuan ligje të rëndësishme, tejkaluan shumë pengesa dhe në mënyrë konstruktive punuan me partnerët ndërkombëtarë”, thuhet në letrën e Milibandit.

Presidenti amerikan, Barack Obama, ka përgëzuar popullin e Kosovës dhe liderët në përvjetorin e parë të Pavarësisë së Kosovës. Presidenti amerikan në letrën drejtuar Sejdiut thotë se SHBA-ja do të vazhdojë ta mbështesë edhe më tutje Kosovën. “Derisa populli i Kosovës punon drejt një ardhmërie të përbashkët, unë dua të theksoj që SHBA-ja do të vazhdojë të mbështesë një Kosovë multietnike, të pavarur dhe demokratike, në përpjekjet e saj që ta zërë vendin e merituar si anëtare e plotë e bashkësisë së shteteve”, thuhet në letrën e Obamës.