12 Dhjetor, zgjedhjet në Kosovë

Deklarata e tij erdhi menjëherë pasi Kuvendi votoi me 66 vota pro mocionin e mosbesimit ndaj qeverisë Thaçi. Krasniqi informoi se ditën e djeshme është dekretuar ligji për zgjedhjet. "KQZ të marrë të gjitha masat e nevojshme për organizmin e zgjedhjeve. Shfuqizohet vendimi i mëparshëm që parashikonte zhvillimin e votimeve më 13 shkurt”, theksoi Krasniqi. Ai deklaroi se ky vendim është marrë pas rënies së qeverisë gjatë mocionit të votuar sot në parlamentin e Kosovës. Kryetari i Kuvendit ushtron në këtë kohë edhe detyrën e presidentit të vendit që pas dorëheqjes nga ky post i Fatmir Sejdiut.

Tensionimi i situatës politike në vend dhe kriza institucionale disa javësh ka ardhur si rrjedhojë e tërheqjes së Lidhjes Demokratike të Kosovës nga koalicioni qeveritar me Partinë Demokratike. Megjithëse, LDK mohon të jetë shkaktare e krizës institucionale, ish partneri në koalicion PDK e akuzon këtë parti se është shkaktare e krizës në vend për interesa të ngushta partiake e personale. Koalicioni ndërmjet këtyre dy partive është vlerësuar nga analistë politikë si koalicion i panatyrshëm, ndërkaq brenda LDK-së gjithnjë ka pasur zëra për largimin e LDK-së nga Qeveria.