* * *

* * *

Apple zbulon modelin e Iphone 6

Apple do të zbulojë modelin e radhës të serive popullore të iPhone në muajin gusht, një muaj më herët nga sa pritej prej vëzhguesve të industrisë, ka raportuar media tajvaneze ditën e premte, duke cituar burime të paidentifikuara.

Versioni i iPhone me ekran 4.7 inç do të hidhet në treg në gusht, raporton “Economic Daily News”, pa specifikuar në cilat tregje do të arrijë në fillim telefoni. Ndërsa modelet me ekran 5.5 inç ose 5.6 inç do të hidhen në treg në shtator, tha gazeta, ashtu siç është vepruar me seritë e mëparshme të iPhone. Po ashtu, gazeta njofton se këtë vit do të prodhohen 80 milionë pajisje celulare iPhone 6.

Vëzhguesit e industrisë kanë thënë se rritja e përmasve të ekranit të iPhone-it nga 4 inç do të ndihmojë në rritjen e fitimeve të firmës “Apple” në krahasim me firmat konkurruese si “Samsung Electronics”, të cilat, sipas tyre i janë përgjigjur dëshirës së konsumatorëve për përmasa më të mëdha të ekranit. Përfaqësuesit e Apple nuk kanë bërë asnjë koment deri më tani.

* * *

Yahoo News Digest vjen në Android

Përdoruesit e telefonave mobil, të cilët bazohen në sistemin operativ Android, me siguri do të jenë të kënaqur të dinë se Yahoo tashmë e ka lëshuar aplikacionin e saj të famshëm Yahoo News Digest edhe në platformën e Google.

Yahoo e ka krijuar aplikacionin e saj të ri, Yahoo News Digest me lajme të reja në ditë që vijnë vetëm në dy periudha të ndryshme gjatë ditës dhe të cilat janë të lehta për tu lexuar, ndërsa përfshijnë edhe grafika dhe diagrame në raste të caktuara.

Yahoo News Digest fillimisht ishte prezantuar në CES 2014 Consumer Electronics Show në Las Vegas në janar të këtij viti, dhe që nga atëherë, aplikacioni ka arritur vetëm në pajisjet e sistemit operativ të Apple, iOS.

Yahoo e ka dizajnuar aplikacionin e saj të ri News Digest për të zgjedhur lajme nga kategori të ndryshme sikurse biznesi, teknologjia apo lajmet botërore, dhe të njëjtat i përditëson në dy periudha ditore, në mëngjes ose në mbrëmje.....

* * *

Inteligjenca Artificiale shënon fundin e njerëzimit

Stephen Hawking, astrofizikant dhe kozmolog në Universitetin e Kembrixhit dhe një grup fizikantësh po përhapin alarmin mbi inteligjencën artificiale, duke shkruar për “The Independent” se suksesi në krijimin e Inteligjencës Artificiale do të jetë “ngjarja më e madhe në historinë botërore”, por po ashtu, edhe “e fundit”.

Shkencëtarët i kanë përdorur argumentet e tyre kundër filmit të ri “Transhendenca”, në të cilin interpreton Johnny Depp.

“Është tunduese të anashkalohet nocioni se makineritë me inteligjencë superiore janë thjesht një fantashkencë. Ky mund të jetë një gabim dhe gabimi më i madh potencial në histori,” shkruajnë autorët.

Fizikantët citojnë njoftimin e Google për makinat që drejtohen vetë, asistentët personalë dixhitalë, si Siri i Apple dhe konkurrentët e tyre të rinj, si dhe shumë përdorime të armëve autonome me Inteligjencë Artificiale, të cilat mund të zgjedhin objektivin e tyre.