Snowden kërkon azil në Brazil

 Ish-kontraktori i inteligjencës amerikane, Edward Snowden, tha mbrëmë vonë se ka kërkuar azil në Brazil. Ai i deklaroi televizionit brazilian, Globo TV, se “dëshiron të jetojë në Brazil”. 

Zoti Snowden, që kërkohet nga autoritetet e Shteteve të Bashkuara, aktualisht jeton në Rusi. Por, azili i përkohshëm në këtë vend i mbaron në muajin gusht të këtij viti.

 Shtetet e Bashkuara ia kanë anuluar pasaportën.

 Snowden tha se formalisht ka kërkuar azil në disa shtete, përfshirë Brazilin.

 Nga ana tjetër, Ministria e jashtme e Brazilit tha se e ka marrë kërkesën e Snowdenit për azil.

 Në dokumentet sekrete të publikuara nga Edward Snowden, vitin e kaluar, shihej se agjencit e Shteteve të Bashkuara e kishin spiunuar Brazilin.

 Rrjedhimisht, Presidentja Dilma Rousseff, e pat anuluar një vizitë zyrtare në Uashington.