Donald Tusk: Shengen para kolapsit

Presidenti i Këshillit të Europës, Donald Tusk, ka tërhequr vërejtjen më 12 Nëntor se, marrëveshja e kufijve të hapur në Bashkimin Europian, që njihet edhe si zona Shengen, është para kolapsit si rezultat i krizës së emigrantëve.

Duke folur në samitin BE-Afrikë në Maltë, Tusk tha se “ruajtja e Shengenit është një garë kundër kohës dhe ne jemi të vendosur për ta fituar këtë garë.”

Komentet e tij pasojnë vendimet e Austrisë, Gjermanisë, Hungarisë, Sllovenisë dhe Suedisë, për të rikthyer kontrollin e kufijve dhe për të ngritur gardhe përreth tyre, në përpjekje për të kontrolluar hyrjet në territoret e këtyre vendeve.

Liderët e Bashkimit Europian në samitin e Maltës kanë nisur zyrtarisht formimin e një fondi emergjence për vendet afrikane, me një shumë fillestare prej 1.8 miliardë eurosh, për të luftuar varfërinë dhe konfliktet që po sjellin fluks të madh të emigrantëve në Europë.