G20 në Kinë

Vetëm pak orë na ndajnë nga mbajtja e samitit të G20, ku liderët e 20 vendeve më të zhvilluara të botës do të diskutojnë rreth mundësive për të rritur bashkëpunimin ekonomik, por edhe për çështje të tjera të rëndësishme.

Pothuajse të gjithë krerët e shteteve ose qeverive kanë mbërritur në qytetin Hangzhou, i cili është nën masa mjaft të rrepta sigurie.

Në këtë samit do të flitet kryesisht për ekonominë botërore pas daljes së Britanisë nga BE-ja, teksa në bazë të raportimeve paraprake, Kina ka ndërmend që të bëjë propozime të shumta për marrëveshje të ndryshme.

Gjithashtu, diskutime do të ketë edhe sa i përket marrëveshjes për uljen e nivelit të ndotjeve në atmosferë si dhe implementimin e suksesshëm të marrëveshjes së klimës që u arrit në Paris vitin e shkuar.

Për t’u theksuar është fakti se vetëm pak orë përpara fillimit të samitit, Kina e ratifikoi akordin, gjë që shihet si një hap mjaft pozitiv duke qenë se vendi aziatik është emetuesi më i madh i botës për dyoksidin e karbonit.

Si një vend pritës, zyrtarët kinezë kanë zhvilluar edhe takimet e para me përfaqësuesit e vendeve të ndryshme. Presidenti Xi Jinping ka pritur në takime bilateral , Presidentin turk, Rexhep Taip Erdogan, Kryeministrin italian Renzi, etj.

Gjithashtu, një takim tjetër i rëndësishëm ishte ai midis sekretarit amerikan të Shtetit John Kerry, si dhe homologut të tij turk, Mevlut Çavusoglu.

Kujtojmë që palët kanë shumë çështje për të folur përfshirë këtu mundësinë e ekstradimit të klerikut Fethullah Gulen, situatën e kurdëve në veriun e Sirisë, etj. Ndërkohë, janë konfirmuar edhe disa takime mjaft të rëndësishme, përfshirë atë Obama-Putin, Erdogan-Putin, etj.

Ky është samiti i fundit i G20 për Presidentin në ikje, Barak Obama, i cili do të lërë zyrën në Janar të vitit të ardhshëm. Ndërkohë, kancelarja Merkel dhe presidenti Hollande dhe Presidenti rus Putin pritet të mbajnë një takim trilateral ku tema kryesore e diskutimit do të jetë Ukraina, aneksimi i Krimesë si dhe sanksionet e vendosura ndaj Moskës.