Larg nacionalizmit tendencioz

Shkrimtari Bujar Plloshtani ditë më parë përmes një komenti politik ndaj zhvillimeve të fundit në rajon, ka shkruar se nacionalizmi në Ballkanin Perëndimor është gjithnjë e më tepër në rritje, pasi partitë politike në pushtet kanë shfrytëzuar mekanizmat e tyre për të krijuar efektin e nacionalizmit tendencioz në shoqëri, me qëllim që partitë në pushtet të përfitojnë poena politik, dhe kështu duke i kthyer në tejngopje popullin për t'i shfrytëzuar në raste të ndryshme. Mirëpo, ai mëtej shkruan se nacionalizmit tendencioz duhet t'i vijë fundi dhe se ndasitë e tilla që krijohen nga pushtetet me qëllime të paramenduara mirë, duhet me çdo kusht t'u vijë fundi dhe se partitë politike në pushtet të mos luajnë me kartën e nacionalizmit, por të ofrojnë mirëqenie sociale dhe ekonomike për shoqëritë e brishta siç janë këto në Ballkanin Perëndimor, shkruan në komentin e tij të fundit Bujar Plloshtani

Nacionalizmit tendencioz në Ballkanin Perëndimor duhet t’i vijë fundi njëherë e përgjithmonë, e them kështu, pasi ky lloj nacionalizmi tendencioz duket sikur më shumë shërben për të tendosur situatën e bashkëjetesës midis komuniteteve, sesa në kthimin drejt mirëbesimit dhe paqes së domosdoshme.

Ndasitë ndërmjet komuniteteve dhe subjekteve politike asnjëherë nuk kanë dhënë vlerën e pashmangshme të ruajtjes së besueshmërisë dhe stabilitetit, por gjithnjë e më tepër është tendosur harku për ta kthyer përmbys çdo realitet të bashkëjetesës dhe bashkërenditjes së veprimit politik, ekonomik, social dhe kulturor.