Federica Mogherini: Rekomandohet hapja e negociatave me Shqipërinë dhe Maqedoninë

Komisioni Evropian ka vendosur rekomandim të pakushtëzuar për hapjen e negociatave të anëtarësimit në Bashkimin Evropian për dy vendet e Ballkanit Perëndimor, Shqipërinë dhe Maqedoninë. 

Ky vendim është bërë i ditur nga përfaqësuesja e lartë e Bashkimit Evropian për Punë të Jashtme dhe Politikë të Sigurisë, Federica Mogherini, gjatë një konference për mediat në Strasburg. 

Sipas Mogherinit, politika e zgjerimit e Bashkimit Evropian është për Unionin një investim në paqe dhe siguri dhe për stabilitetin e Evropës. 

“Nga 6 partnerë të Ballkanit Perëndimor, Serbia dhe Mali i Zi kanë ecur mirë në negociata. Sot Komisioni rekomandon që këshilli të vendosë të hapë negociatat për anëtarësim me Shqipërinë dhe Maqedoninë. Po punojmë për një opinion për kërkesën e Bosnje dhe Hercegovinës dhe me autoritetet kosovare po punojmë për një progres të mëtejshëm”, tha Federica Mogherini. 

Shefja e diplomacisë evropiane, ndër tjerash tha, se Ballkani Perëndimor është Evropë dhe do të jetë pjesë e të ardhmes së Unionit, sipas saj, në një Bashkim Evropian të fortë e stabil. 

“Është në interesin tonë të kemi një politikë zgjerimi të suksesshëm. Kjo ofron mirëqenie që është në përfitim reciprok me vendet e Unionit Evropian dhe vendeve që aspirojnë të anëtarësohen. Është një faktor i rëndësishëm që shtyn transformimin dhe rrit stabilitetin dhe sigurinë. Vetë procesi është ndërtuar në kritere të mirëvendosura. Secili vend dhe partner vlerësohet në bazë të meritave”, theksoi Federica Mogherini.